TEHAMA SASA NI NDUGU WA LAZIMA

Na OR-IKNT

DODOMA, Agosti 27, 2026

Katika zama ambazo teknolojia imekuwa sehemu muhimu ya maisha na utendaji wa kila siku, matumizi ya Teknolojia ya Habari na Mawasiliano (TEHAMA) yameendelea kuwa kiungo muhimu katika uhifadhi na usimamizi wa kumbukumbu na nyaraka za Taifa.

Moja ya majukumu muhimu ya Ofisi ya Rais, kupitia Idara ya Kumbukumbu na Nyaraka za Taifa, ni kuhakikisha nyaraka muhimu za Serikali na Taifa zinahifadhiwa kwa usalama na zinapatikana kwa urahisi wakati zinapohitajika.

Katika kutekeleza jukumu hilo, Idara imeendelea kutumia teknolojia ya kisasa kwa kubadilisha nyaraka kutoka katika nakala ngumu kwenda katika mfumo wa kidijitali. Hatua hiyo inalenga kuongeza muda wa uhifadhi wa nyaraka, kupunguza hatari ya kuharibika kwa nakala za awali na kurahisisha upatikanaji wa taarifa.

Akieleza kuhusu kazi hiyo, Mary Mollel kutoka Huduma za Nyaraka, amesema miongoni mwa kazi zinazofanyika ni kubadilisha nyaraka zilizopokelewa katika nakala ngumu na kuzihifadhi katika mfumo wa kidijitali.

Amesema mchakato huo unafanyika kwa kutumia vifaa na mitambo maalumu inayoweza kuchakataji na kuhifadhi nyaraka kwa kuzingatia viwango vya ubora unaohitajika.

Kwa upande wake, Joseph Mnaya kutoka Kitengo cha TEHAMA, amesema teknolojia imekuwa sehemu muhimu katika utekelezaji wa majukumu ya kisasa, hususan katika usimamizi wa taarifa na uhifadhi wa kumbukumbu.

Mnaya amesema TEHAMA haiwezi kutenganishwa na maendeleo ya sasa kwa kuwa inawezesha taasisi kufanya kazi kwa ufanisi zaidi, kusimamia taarifa kwa urahisi na kuhakikisha kumbukumbu muhimu zinahifadhiwa kwa usalama.

Katika mchakato wa kuchanganua nyaraka, amesema umakini katika maandalizi ya kila hati ni jambo muhimu ili kuhakikisha taarifa inayohifadhiwa kidijitali inakuwa na ubora unaohitajika.

Ameeleza kuwa hata hati inayochanganuliwa inapaswa kuandaliwa vizuri, ikiwemo kuwekwa ikiwa imenyooka, ili iweze kuchanganuliwa kwa usahihi na kuhifadhiwa katika mfumo wa kidijitali bila kupoteza ubora wa taarifa iliyomo.

Kazi hiyo iliyoshuhudiwa katika Ofisi ya Rais, Idara ya Kumbukumbu na Nyaraka za Taifa, jijini Dodoma, Agosti 27, 2026, inaonesha kwa vitendo umuhimu wa kuunganisha uhifadhi wa historia ya Taifa na matumizi ya teknolojia ya kisasa.

Kwa sasa, TEHAMA si nyenzo ya ziada katika uhifadhi wa kumbukumbu, bali ni ndugu wa lazima katika kuhakikisha hazina ya Taifa inalindwa, inasimamiwa na inapatikana kwa vizazi vya sasa na vijavyo.

Nyuma ya kila nyaraka kuna historia; nyuma ya kila taarifa kuna kumbukumbu. Na katika zama hizi za kidijitali, TEHAMA ndiyo daraja linalounganisha historia ya jana na mahitaji ya kesho.